Një ngjarje e rëndë ndodhi në janar të vitit 2020, ku shtetasi Jan Prenga u rrëmbye në Kamëz dhe më pas u torturua dhe u vra për shkak të një prishjes së pazareve të drogës mes mes bandës së vëllait të tij me një bandë tjetër. Prenga u rrëmbye mesditën e 17 janarit të vitit 2020 në Kamëz. BË ka siguruar videon kur Jani Prenga nxirret i pajetë nga një ‘Range Rover’, nga personat që e morën peng.
Pamjet janë marrë nga kamerat e sigurisë brenda garazhit të kompleksit luksoz “Golden Resort” në Shijak ku shihet se trupi i 49-vjeçarit Jan Prenga nxirret i zhveshur nga makina e bardhë. Është ky momenti kur katër persona të maskuar transportojnë trupin e tij në një furgon të bardhë brenda garazhit. Kujtojmë se trupi i tij ende nuk është gjetur.
Kamerat e sigurisë kanë kapur dhe të tjera momente tronditëse në lidhje me pengmarrjen e Jan Prengës, babait të 3 fëmijëve, kur autorët mundohen të fshehin çdo gjurmë që i lidh ata me ngjarjen e rëndë. Pas tërheqjes së trupit, 4 autorët, tashmë të shkujdesur plotësisht, pasi kanë sistemuar trupin e Jan Prengës, shfaqen në garazh të pamaskuar.