Ekzekutimi i biznesmenit Ruzhdi Hoxha, dëshmia e djalit në Polici: Do digjte makinat e “SALILLARIT” për 200 mijë euro! (DETAJET E REJA)
Biznesmeni nga Tirana Ruzhdi Hoxha, u gjet i vdekur dy ditë më parë në periferi të kryeqytetit, në zonën e Qafë Mollës në Dajt. Si autor të dyshuar të ngjarjes janë arrestuar dy vëllezërit Rrushi, Ferdinant (Fredi) dhe Pajtim Rrushi.
Në dëshminë në Polici djali i viktimës Ruzhdi Hoxha, E.Hoxha, ka deklaruar se babai i tij bashkë me një person tjetër kishin marrë përsipër që të digjnin makinat e kompanisë “Salillari” dhe do të përfitonin 200 mijë euro. Por se kush ishte porositësi nuk ka të dhëna.
Djali ka dhënë informacione të shumta për aktivitetin e të atit si dhe njerëzit me të cilët shoqërohej në mënyrë që policia ta gjente sa më shpejt dhe të zbardhte ngjarjen. Gazetarja Klodiana Lala raporton se aktiviteti i 43 vjeçarit është një nga pistat ku po hetohet për zbardhjen e motiveve të krimit.
Nga aktet në dosjen hetimore rezulton se më 24 tetor është paraqitur shtetasi Saimir Hoxha, një nga djmetë e viktimës, i cili ka pretenduar se “kanë humbur kontaktet me babain e tij që më 21 tetor dhe dyshojnë se mund t’i ketë ndodhur ndonjë gjë e keqe”.
Më pas është paraqitur shtetasi E.Hoxha, djali tjetër, i cili ka deklaruar se babai i tij i kishte treguar se “së bashku me shokun e tij Gj. L., kishin marrë përsipër kundrejt pagesës 200 mijë euro të digjnin makinat e shoqërisë ‘Salillari’, të cilat ndodheshin në zonën e Marikaj, në afërsi të Vorës”.
Këtë punë ia kishte gjetur vëllai i shtetasit Gj.L. Ata kishin shkuar më datë 7 tetor në këto ambiente, por nuk kishin mundur të kryenin djegien e makinave.
Sipas dosjes Policore, për këtë ngjarje kishte dijeni dhe shtetasi E.Gj. Ky i fundit është në dijeni të një konflikti që ka pasur shtetasi Ruzhdi Hoxha me një shtetas të cilin e njeh vetëm me emrin Visi.
Nga deklarimet e marra rezulton se Ruzhdi Hoxha më 21 tetor, rreth orës 23:30, ka qenë duke pirë kafe tek një lokal në autostradë, në rrugën dytësore ngjitur me një biznes të njohur, me dy shokët e tij E. B. dhe E.T.
Më pas e kanë marrë në telefon dhe ka takuar shtetasin Fredi Rrushi, K.I. dhe A.F., të cilët kanë qenë me automjetin tip “Pasat” me ngjyrë gri. Të tre këta persona janë banues në zonën e Treshit në Tiranë. Pasi e kanë marrë në makinë ne tyre shtetasin Ruzhdi Hoxha janë nisur në drejtim të Treshit. Kur kanë mbërritur tek ky vend, shtetasi K.I. dhe A.F., kanë zbritur nga makina duke u ndalur tek lokali i shtetasit K.I., ndërsa Fredi Rrushi dhe Rruzhdi Hoxha kanë vazhduar duke bërë një xhiro me makinë në këtë lagje.
Pasi kanë bërë një xhiro, Fredi Rrushi ka shpjeguar se e ka zbritur nga makina Rruzhdi Hoxhën në afërsi të stacionit të Treshit.
Nga administrimi i tabulateve të Ruzhdi Hoxhës, telefonata e fundit është ajo e datës 21 tetor, ora 23:42 me numrin e telefonit në përdorim të A.F. (në deklarime rezulton se Fredi Rrushi i ka kërkuar këtij shtetasi ta marrë në telefon Ruzhdiun).
Nga këqyrja e pamjeve filmike të sjella nga ana e shtetasit E.Hoxha, djali i viktimës, pamje të cilat janë të parkimit të ndodhur në hyrje të parkut të liqenit në Tiranë, rezulton se Ruzhdi Hoxha ndodhet në këto ambiente rreth orës 20:53, sipas orës së kamerave. Ai mbante të veshur një xhup pa mëngë ngjyrë të errët, një bluzë, e cila nga pamjet duket si ngjyrë gri dhe pantallona të ngushta ngjyrë të errët.
