“Është jetike për anëtarësimin e vendit”, BE thirrje Shqipërisë: Nxirrni para drejtësisë gjithë të korruptuarit
Delegacioni i Bashkimit Evropian në Tiranë ka dhënë një mesazh të fortë në Ditën Ndërkombëtare kundër Korrupsionit.
Përmes një postimi në rrjetet sociale BE thekson se korrupsioni shter burimet jetike të Shqipërisë, gjithashtu ndikon dhe në besimin e publikut te institucionet si dhe ngadalëson ndjeshëm zhvillimin ekonomik.
Ndër të tjera BE shton se ata do të qëndrojnë krah Shqipërisë dhe popullit të saj në këtë luftë.
“Korrupsioni shter burimet jetike të Shqipërisë, ndikon në shtetin ligjor dhe në besimin e publikut tek institucionet, si dhe ngadalëson ndjeshëm zhvillimin ekonomik. Në Ditën Ndërkombëtare kundër Korrupsionit, u bëjmë thirrje gjithë institucioneve që të intensifikojnë veprimet e tyre kundër korrupsionit dhe të nxjerrin para drejtësisë gjithë ata që janë të përfshirë në akte korrupsioni.
Është jetike për të ardhmen e popullit shqiptar dhe për anëtarësimin e Shqipërisë në BE. BE-ja qëndron krah Shqipërisë dhe popullit të saj në këtë luftë”, thuhet në mesazhin e BE.
