Moti i keq me stuhi, dëborë dhe ngrica/ Disa fshatra të izoluara, ja akset rrugore të bllokuara dhe qytetet problematike…
Prej disa ditësh vendi është përfshirë nga një valë e të ftohtit me temperatura të ulëta, stuhi, dëborë dhe ngrica. Në disa zona malore ka pasur edhe problematike në qarkullimin e automjeteve për shkak të pranisë së akullit në rrugë.
Reshjet e borës janë ndërprerë gjatë mbrëmjes së djeshme, ndërsa gjatë natës janë shënuar temperatura të ulëta nga -5 deri -10 gradë në zonat e thella në lartësi. Në të gjitha akset ka pasur probleme nga ngricat, ndaj është këshilluar përdorimi i zinxhirëve.
Probleme ka patur edhe në rrugët e brendshme të qytetit të Peshkopisë, pasi rrugët që janë hapur nga makinat janë të ngushta dhe nuk është hedhur kripë. Në trupin e rrugës është krijuar shtresë akulli, çka krijon probleme për drejtuesit e mjeteve dhe këmbësorët.
Të izoluara plotësisht janë Njësia Administrative Lurë dhe Selishtë, disa fshatra të njësisë Sllovë, Kala e Dodës dhe Melan.
Njësitë Lurë, Selishtë, Reç, Sllovë, Kala e Dodës dhe disa fshatra të Luznisë kanë kaluar 48 orë pa energji elektrike, pas rrëzimit të disa shtyllave.
Në Bulqizë probleme ka në njësitë Administrative Ostren, Trebisht, Krastë, ku ka pasur bllokim të rrugëve që lidhin fshatrat dhe mungesë të energjisë elektrike.
Aksi kombëtar Peshkopi – Burrel – Tiranë kalimi bëhet pa probleme, por duhet kujdes tek pishat e Bulqizës gjatë natës dhe orët e para të mëngjesit si pasojë e ngricave.
Rruga e Arbrit kalohet pa probleme gjatë ditës, por duhet të tregohet kujdes orët e natës për shkak të ngricave, këshillohet përdorimi i mjeteve antirrëshqitëse.
Aksi Ura e Çerenecit – Librazhd kalimi bëhet me zinxhirë me detyrim, për shkak se ka borë në trupin e rrugës dhe në Klenjë trashësia shkon më 80 cm.
Aksi Qafa e Buallit – Krastë kalimi pa probleme deri në qendër të njësisë, por fshatrat janë të bllokuar.
Aksi Peshkopi – Kala e Dodës – Kukës kalimi bëhet pa zinxhirë gjatë ditës, por natën dhe orët e para të mëngjesit këshillohet përdorimi i mjeteve antirrëshqitëse për shkak të ngricave.
Aksi Peshkopi – Draj Reç – Kukës, kalimi vetëm me zinxhirë.
Policia rrugore porosit drejtuesit e mjeteve, kryesisht ato që vijnë nga Tirana ose rrethe të tjera që të përdorin gomat e dimrit dhe mjete antirrëshqitëse(zinxhirë)
