Një vit pa Klodian Rashën, nesër mbahen homazhe në nder të të riut që u vra nga efektivi i policisë
Ditën e nesërme më datën 8 Dhjetor, bëhet një vit nga vrasja e të riut Klodian Rasha nga efektivi i policisë Nevaldo Hajdaraj. Grupe të shoqërisë civile kanë njoftuar se pasditen e së mërkurës do të bëjnë homazhe për të riun i cili humbi jetën në moshë fare të re, përballë institucionit të Ministrisë së Brendshme.
“Për Klodian Rashën. Homazhe Përkujtimore. E mërkurë, ora 18:00. Përballë Ministrisë së Brendshme. Më 8 dhjetor, do ndezim qirinj këtu. Klodian Rasha u vra në moshën 25 vjeç”, shkruhet në njoftim.
Kujtojmë se Klodian Rasha u vra mëngjesin e 8 Dhjetorit 2020 nga efektivi i policisë, Nevaldo Hajdaraj, me pretendimin se shkeli orën policore të vendosur nga Komiteti Teknik. Pas vrasjes së tij, qytetarë të shumtë u ngritën në protestë, ku pati edhe përplasje mes tyre e forcave e policore, të cilat përdorën edhe gaz lotsjellës për të shpërndarë turmat e protestuesve.
