Operacion i madh në Portin e Durrësit/ Vihen në pranga 3 persona, sirianë dhe palestinezë për falsifikim dokumentesh, procedohet penalisht edhe një femër
Një operacion i madh është organizuar në Portin e Durrësit, ku kanë mbetur të arrestuar 4 persona dhe është proceduar penalisht edhe një tjetër.
Të arrestuarit janë shtetas sirianë dhe palestinezë të cilët akuzohen pë falsifikim dokumentesh dhe vizash gjermane në tentativë për të kaluar kufirin shqiptar. Mes veprimeve penale të ndërmarra, ka qenë edhe procedimi i shtetases siriane R.F 37 vjeçe.
Njoftimi i Plotë:
Port, Durrës
Finalizohet operacioni policor i koduar “Pritësi”, për goditjen e veprimtarisë kriminale në fushën e kalimit të paligjshëm të kufirit dhe falsifikimit të dokumenteve.
Operacioni i zhvilluar nga Policia Kufitare në Portin e Durrësit, në bashkëpunim me strukturat e DVP Durrës.
Arrestohen në flagrancë 4 shtetas, procedohet penalisht 1 tjetër.
Sekuestrohen viza turistike të dyshuara të falsifikuara.
Në vijim të punës për parandalimin dhe goditjen e veprimtarisë kriminale të falsifikimit të dokumenteve dhe të dhënies ndihmë për kalim të paligjshëm të kufirit, si rezultat dhe i masave të shtuara, shërbimet e Policisë Kufitare në Portin e Durrësit, në bashkëpunim me strukturat e DVP Durrës, kanë organizuar punën dhe kanë finalizuar me sukses operacionin policor të koduar “Pritësi”, në kuadër të të cilit u arrestuan në flagrancë shtetasit:
A. H., shtetas gjerman, për veprat penale “Dhënie ndihme për kalim të paligjshëm të kufirit” dhe “Falsifikimi i letërnjoftimeve, pasaportave apo i vizave”;
A. A., 58 vjeç, shtetas palestinez, M. H., 33 vjeç, M. K., 46 vjeç, shtetas sirian, për veprën penale “Falsifikimi i letërnjoftimeve, pasaportave apo i vizave”.
Gjithashtu u procedua penalisht shtetasja R. F., 37 vjeçe, shtetase siriane, për veprën penale “Falsifikimi i letërnjoftimeve, pasaportave apo i vizave”.
Këta shtetas kanë tentuar të kalojnë kufirin duke përdorur viza turistike gjermane të dyshuara të falsifikuara, me anë të ndihmës së shtetasit A. H., në Pikën e Kalimit Kufitar Porti i Durrësit, në dalje të territorit të Republikës së Shqipërisë.
Materialet i kaluan Prokurorisë së Rrethit Gjyqësor Durrës, për veprime të mëtejshme.
