Pro dhe kundër dënimit me vdekje, disa kundërshtojnë rikthimin e këtij ligji: Është primitiv
Çesk Simoni udhëtoi nga Shkodra për të firmosur në Fier për peticionin për dënimin me vdekje, pasi disa vite më parë i vranë familjen. Por të tjerë qytetarë thonë se ligji me vdekje nuk është zgjidhje për këtë situatë të përsëritur.
20 vjet më parë Çesk Simonit i vranë djalin 3 vjeç dhe bashkëshorten, ndaj mori rrugën nga Shkodra drejt Fierit, për të Firmosur peticionin e familjes Vasiu për rikthimin e dënimit me vdekje!
Familjen ia vrau Sadik Kuniqi, i cili u quajt vrasësi serial i Shkodrës, pasi më herët kishte kryer edhe dy ekzekutime të tjera.
“Më ka ndodhur dhe mua. Sa herë që ndodhin ngjarje të tilla e përkujtoj me dhimbje. Më mbytën gruan dhe djalin 3 vjeç në krevat në 2002. Bën 20 vite. Çdo viktimë fëmije e përjetoj.”
Peticioni për rikthimin e dënimit me vdekje pritet të përhapet në të gjithë vendin, por jo të gjithë janë dakord.
Disa e konsiderojnë dënimin me vdekje si një akt primitiv dhe se nuk do ta rregullonte situatën.
“Si zgjidhje nuk është, më mirë ndërto qendra që të merren me fëmijët dhe me të rriturit si puna e atij personit se sa t’i biesh shkurt me dënim me vdekje.”