25-vjeçarja shqiptare aksidentohet për vdekje në Kanada, makina përfundoi në liqenin e ngrirë
Me 20 janar, Agnesa Shukulli u përfshi në një aksident automobilistik pranë Lakeshore Boulevard East. Makina ku ajo udhëtonte me bashkëjetuesin e saj shkodran përfundoi në Liqenin e ngrirë të Ontarios dhe, pavarësisht se ajo u dërgua me urgjencë në spital, fatkeqësisht nuk arriti të mbijetojë ashtu sikurse partneri i saj.
Në nëntor të 2021, Agnesa mbërriti në Kanada për t’iu bashkuar motrës së saj, Anxhela dhe për të ndihmuar prindërit e saj në Shqipëri për të krijuar një të ardhme plot shpresë që fatkeqësisht nuk përfundoi e tillë.
Familja e saj tani po përballet me dhimbjen e paimagjinueshme të humbjes së një prej njerëzve të tyre më të shtrenjtë por edhe me sfidën financiare të kthimit të trupit të vajzës së tyre në Shqipëri, në mënyrë që të prehet në paqe në atdheun e saj.
Në këtë periudhë të vështirë që po kalojnë, ata kërkojnë ndihmën e shqiptarëve që trupi i Agnesës të prehet në Shqipëri pasi çdo ndihmë, sado e vogël, do të bëjë një ndryshim të madh.
