26 kg kanabis në bagazhe, arrestohet në Rinas 21 vjeçari! Po vinte nga Dubai me lëndën narkotike…
Një 21 vjeçar banues në Luksemburgu arrestua nga policia në Rinas, teksa po futej në Shqipëri. Të riut iu gjet në bagazhet e tij 26 kg lëndë e dyshuar narkotike kanabis.
Brice Tchantchou, 21 vjeç po vinte nga Dubai në Rinas, teksa inteligjenca policore kishte informacione për një shtetas që po udhëtonte nga Dubai në Rinas me një sasi lënde narkotike.
‘Shërbimet e Komisariatit të Policisë Rinas në bashkëpunim me autoritetet doganore në kuadër të kontrolleve të shtuara për parandalimin dhe goditjen e paligjshmërisë dhe në veçanti të trafikimit të lëndëve narkotike, bazuar dhe në informacionet e siguruara nga inteligjenca policore se një shtetas që do të udhëtonte nga Dubai drejt Rinasit, kishte fshehur në bagazhet e tij, sasi lënde të dyshuar narkotike kanabis, menjëherë kanë organizuar punën dhe në bashkëpunim me Sektorit për Hetimin e Narkotikëve, kanë finalizuar operacionin policor të koduar “Fluturimi”. ‘, thotë policia.
Policia sekuestroi 26 kilogramë e 700 gramë lëndë e dyshuar narkotike kanabis.
‘Gjatë këtij operacioni u bë arrestimi i shtetasit B. T., 21 vjeç, banues në Luksemburg.
Gjatë kontrollit në bagazhet e 21-vjeçarit, shërbimet e Policisë gjetën dhe sekuestruan në cilësinë e provës materiale, 26 kilogramë e 700 gramë lëndë të dyshuar narkotike kanabis.’, njofton policia.
Sakaq, vijon puna për identifikimin dhe kapjen e shtetasve të tjerë të implikuar në këtë veprimtari kriminale.
