29 Nëntori – Dita e Çlirimit të Shqipërisë përkujtohet me nderime në Patos
Në një atmosferë respekti dhe mirënjohjeje, në qytetin e Patosit u zhvilluan homazhe me rastin e 29 Nëntorit, Ditës së Çlirimit. Ceremonia u mbajt pranë busteve të dëshmorëve, ku Kryetari i Bashkisë së Patosit, z. Fation Duro, Prefekti i Qarkut Fier, z. Arben Çuko, Deputetja, Znj. Antoneta Dhima dhe përfaqësues të LANÇ-it, familjarë të dëshmorëve, drejtues institucionesh dhe qytetarë vendosën kurora dhe buqeta me lule për të nderuar aktin heroik të bijve dhe bijave që dhanë jetën për lirinë e atdheut.
Deputetja e Qarkut Fier, znj. Antoneta Dhima, përmes një mesazhi publik, vlerësoi sakrificën e dëshmorëve dhe rolin e veteranëve të Luftës Antifashiste Nacionalçlirimtare. Ajo theksoi rëndësinë e ruajtjes së vlerave kombëtare dhe angazhimin për një Shqipëri Evropiane, duke shprehur mirënjohje të thellë për ata që luftuan dhe sakrifikuan për një të ardhme më të mirë.
Dita e Çlirimit, një nga datat më të rëndësishme në historinë e Shqipërisë, vazhdon të jetë një moment përkujtimi dhe reflektimi për lirinë dhe sakrificat e brezave të kaluar.
