Raporti i Ministrisë së Mbrojtjes: Lumenjtë dhe qarqet më të rrezikuar nga përmbytjet
Nga 8 lumenjtë me impakt të madh në territorin e Shqipërisë, Vjosa, Semani, Drini dhe Buna janë 4 lumenj të cilësuar si katastrofikë për riskun e lartë të përmbytjeve.
Të dhënat bëhen të ditura nga raporti për vlerësimin e riskut të përmbytjeve nga lumenjtë, përrenjtë dhe çarjet e digave, i hartuar nga Ministria e Mbrojtjes dhe Agjencia Kombëtare e Mbrojtjes Civile.
Në vend të pestë renditet Erzeni, me një risk të lartë për përmbytje në Shqipëri, i ndjekur nga Ishmi dhe Mati.
I vetmi që ka risk më të ulët për përmbytje përgjatë rrjedhës së tij është Shkumbini.
Vlora, Fieri, Berati dhe Shkodra janë katër qarqet me riskun më të lartë për përmbytje për shkak të daljes nga shtrati të përrenjve dhe lumenjve.
Siç duket nga harta, këto qarqe janë shënjuar me ngjyrë të kuqe për riskun katastrofik që ato mbartin për përmbytje, të ndjekura nga Durrësi me një risk të lartë.
Dibra, Kukësi dhe Korça janë qarqet me riskun më të ulët për përmbytje. Por për shkak të ndryshimeve klimatike, asnjë qytet nuk mbetet imun ndaj përmbytjeve.
Sipas ekspertëve, në Shqipëri ndryshimet klimatike po sjellin më pak reshje vjetore, por më shumë prurje, duke shkaktuar fillimisht thatësirë dhe më pas përmbytje.
