Hyn në fuqi udhëzimi për rivlerësimin e pronave.
Është botuar sot në Fletoren Zyrtare udhëzimi i Ministrisë së Financave që i hap rrugë rivlerësimit të pasurive të paluajtshme në Shqipëri. Të drejtën e kryerjes së rivlerësimit e kanë të gjithë ata individë që kanë në pronësi pasuri të paluajtshme (tokë dhe/ose ndërtesë) të regjistruar, ose që fitojnë pronësinë dhe e regjistrojnë atë deri më 31 dhjetor 2026.
Gjithashtu, rivlerësimi mund të kryhet edhe për ato pasuri që e kanë kaluar një herë këtë proces. Ai mund të kryhet nëpërmjet Agjencisë Shtetërore të Kadastrës ose nëpërmjet ekspertëve të licencuar për pasuritë e paluajtshme.
Baza tatimore llogaritet si diferenca midis vlerës së dalë nga rivlerësimi dhe vlerës së zbritshme të regjistruar më parë. Për ndërtesat, nga çmimi i referencës zbritet 1% për çdo vit përdorimi, deri në maksimumi 30%. Për tokat, çmimi minimal fiskal është ai për metër katror sipas hartës së vlerave në fuqi.
Hyrja në fuqi e këtij udhëzimi pritet të çlirojë tregun e pasurive të paluajtshme, një kërkesë kjo e paraqitur prej kohësh edhe nga shoqatat e ndërtuesve.
