Aksident në Fier/ Dy të plagosur dhe një i arrestuar, 70-vjeçari nga Berati përfundon në pranga pas përplasjes së automjeteve
Foto ilustruese
Një aksident rrugor i regjistruar në territorin e qarkut Fier ka përfunduar me dy persona të plagosur dhe me arrestimin e një 70-vjeçari.
Specialistët e Sektorit të Qarkullimit Rrugor pranë Drejtorisë Vendore të Policisë Fier arrestuan shtetasin A. P., 70 vjeç, banues në Berat, pasi automjeti që ai drejtonte u përplas me një automjet tjetër me drejtues shtetasin Xh. B., 67 vjeç.
Si pasojë e përplasjes janë dëmtuar drejtuesi A. P., si edhe pasagjerja që udhëtonte në automjetin e drejtuar nga 67-vjeçari. Të plagosurit janë transportuar për ndihmë mjekësore në Spitalin e Traumës ne Tiranë, ku ndodhen jashtë rrezikut për jetën.
Burime zyrtare bëjnë me dije se materialet procedurale i janë referuar Prokurorisë së Fierit për veprime të mëtejshme, ndërsa po vijojnë hetimet për të zbardhur plotësisht rrethanat e aksidentit.
