Zhdukja misterioze e 21-vjeçares rumune në Itali, një shqiptar i dyshuar! Shoqja: Donte të punonim për të
Hetimet për zhdukjen e Elena Rebeca Burcioiu, rumunia 21-vjeçare për të cilën nuk ka më lajme që nga pasditja e së hënës, më 2 mars, duket se po përqendrohen edhe te pista e prostitucionit.
Në veçanti, vëmendja është përqendruar te një shqiptar, i cili disa ditë më parë dyshohet se kishte kërcënuar atë dhe një shoqe të saj, shkruan agjensia italiane e lajmeve Ansa.
Forcat e rendit dhe Mbrojtja Civile vazhdojnë prej 11 ditësh kërkimet për vajzën në fshatrat e zonës së Foggia-s, ku ajo u pa për herë të fundit dhe ku, pas denoncimit për zhdukje të bërë nga një 38-vjeçare rumune dhe shoqe dhome e Elenës, u gjetën triko leshi që 21-vjeçarja kishte veshur atë ditë dhe, disa kilometra më larg, telefoni i saj celular.
Elementet që po orientonin hetimet u dhanë hetuesve nga shoqja e saj në denoncimin e detajuar të paraqitur pasditen e 2 marsit. 38-vjeçarja tregoi për katër ditët e fundit para zhdukjes. Të dyja kishin ardhur në Itali rreth tre muaj më parë, kishin marrë me qira një apartament në Canosa di Puglia, në veri të zonës së Barit, dhe kishin filluar të punonin në bujqësi. Pas disa javësh kishin vendosur të zhvendoseshin në zonën e Foggia-s me qëllim që të prostituonin përgjatë rrugës shtetërore 16, që nga kryeqendra e provincës shkon drejt San Severo, për të fituar disa para më shumë.
Më 27 shkurt, ndërsa Elena ndodhej nën një urë pranë daljes për Manfredonia, një burrë me kombësi shqiptare u ndal duke e ngacmuar dhe duke u përpjekur ta tërhiqte në makinë me të, për t’u larguar më pas. Kështu i kishte treguar 21-vjeçarja shoqes së saj. Menjëherë pas kësaj, shqiptari u kthye, duke kërkuar para nga të dyja që t’i lejonte të vazhdonin të prostituonin aty, duke u paraqitur edhe në ditët pasuese dhe duke përsëritur kërcënimet dhe kërkesat për para: ai kërkoi 150 euro çdo tre ditë nga secila prej tyre. Herën e fundit që shoqja e Elenës e pa ishte të dielën e 1 marsit, një ditë para zhdukjes së 21-vjeçares, kur shqiptari i kishte kërkuar të punonte për të, ofertë që 38-vjeçarja e kishte refuzuar menjëherë.
Në denoncim përfshihet edhe rrëfimi i asaj që ndodhi në mëngjesin kur vajza u zhduk. Sipas shoqes së saj, në orën 11:16, Elena ishte larguar me një BMW të zezë, me një djalë brenda, ndryshe nga shqiptari që i kishte kërcënuar ditët e mëparshme. E shqetësuar sepse ajo nuk po kthehej, në 12:37 shoqja e kishte telefonuar. Telefonata u ndërpre papritur ndërsa të dyja po flisnin dhe në sfond dëgjohej zëri i burrit. Që nga ai moment telefoni vazhdoi të binte pa marrë përgjigje.
Pas denoncimit për zhdukje, hetuesit e gjetën telefonin rreth dy kilometra larg urës ku ajo ishte parë duke u larguar me makinë. Nga dëshmia rezulton gjithashtu se dyshimet e gruas nuk bien mbi djalin e fundit, por mbi shqiptarin: “ai dëshiron të na detyrojë të punojmë për të”, ka deklaruar 38-vjeçarja në procesverbal.
Prej ditësh, qen të specializuar dhe dronë po kontrollojnë zonën, duke inspektuar edhe shtëpi të braktisura dhe puse. Ndërkohë që kërkimet vazhdojnë pa ndërprerje, ka fare pak siguri: përpara se të zhdukej pa lënë gjurmë, në anë të rrugës u gjet xhaketa e Elenës dhe, pak më tej, telefoni i saj. Kontakti i fundit ishte telefonata me shoqen në 12:37, pastaj heshtje.
