Dita e Verës mbledh qindra qytetarë në Mallakastër, festa e pranverës sjell muzikë, sport dhe traditë në bregun e liqenit të Ballshit
Atmosfera festive e Ditës së Verës ka përfshirë edhe këtë vit Mallakastrën, duke e kthyer qytetin në një qendër të gjallë argëtimi, muzike dhe tradite. Përgjatë bregut të liqenit të Ballshit, qindra qytetarë të të gjitha moshave janë bërë pjesë e aktiviteteve të shumta të organizuara nga bashkia, duke i dhënë festës një gjallëri të veçantë dhe duke krijuar një atmosferë plot ngjyra e buzëqeshje.
Programi i kësaj dite nisi që në orët e para të mëngjesit me Panairin e shkollave “Art dhe Zeje”, ku nxënësit ekspozuan punimet e tyre kreative dhe prezantuan talentin e tyre përpara qytetarëve dhe vizitorëve. Punimet artizanale, pikturat dhe produktet e përgatitura nga vetë nxënësit sollën një ndërthurje të bukur mes traditës dhe kreativitetit të brezit të ri.
Festimet vijuan me aktivitete sportive, ku të rinjtë u përfshinë në ndeshje volejbolli dhe gara me biçikleta, duke sjellë energji dhe emocione për të gjithë të pranishmit. Një nga momentet më të veçanta të festës ishte ekspozita e makinave retro dhe parada e motorrave nga “Vespa Club”, që tërhoqi vëmendjen e shumë qytetarëve dhe vizitorëve të apasionuar pas automjeteve klasike.
Mes pjesëmarrësve në paradën e motorrave ishte edhe aktori Marjus Dervishi, i cili u shpreh i emocionuar nga adrenalina dhe atmosfera festive që ofron Dita e Verës në Mallakastër.
Në këtë festë morën pjesë edhe përfaqësues të pushtetit vendor dhe qendror, mes tyre kryebashkiaku Qerim Ismailaj dhe deputeti i zonës Klevis Jahaj, të cilët u bashkuan me qytetarët për të ndarë gëzimin e kësaj dite simbolike.
Koncerti me këngëtarë live, aktivitetet kulturore dhe gastronomia tradicionale plotësuan mozaikun e festimeve, duke e kthyer 14 Marsin në një ditë të paharrueshme për Mallakastrën. Festa e pranverës jo vetëm që solli argëtim dhe gjallëri, por edhe bashkoi komunitetin në një atmosferë miqësore, duke ruajtur dhe promovuar traditat e bukura shqiptare. 🌸
