Qindra besimtarë myslimanë falin namazin e Fitër Bajramit në Fier
Pas përfundimit të muajit të shenjtë të Ramazanit, besimtarët myslimanë në Shqipëri dhe në mbarë botën festojnë sot Fitër Bajramin, një ndër festat më të rëndësishme të fesë islame.
Që në orët e para të mëngjesit, edhe në Fier qindra besimtarë janë mbledhur në sheshin qendror të qytetit, ku kanë kryer faljen e namazit të kësaj dite të shenjtë. Ceremonia nisi në orën 06:30 dhe u parapri nga fjala e myftiut të Fierit, Mikel Hazizolli, i cili përcolli mesazhe paqeje, harmonie dhe solidariteti mes njerëzve.
Në ligjëratën e tij, Hazizolli uroi të gjithë besimtarët myslimanë dhe i ftoi ata të kontribuojnë më shumë për ndërtimin e një shoqërie dinjitoze, të qetë dhe të bashkuar.
Pas faljes, besimtarët shkëmbyen urime me njëri-tjetrin, ndërsa atmosfera në qytet ishte festive dhe e mbushur me ndjenja mirënjohjeje. Festa e Fitër Bajramit vijon më pas në familjet fierake me dreka tradicionale, si shpërblim për sakrificën e agjërimit gjatë 30 ditëve të Ramazanit.
