Turistja holandeze bie nga lartësia në Kalanë e Beratit, në gjendje kritike dërgohet në spital
Një ngjarje e rëndë është raportuar në Kalanë e Beratit, ku një turiste nga Holanda ka rënë aksidentalisht nga një lartësi prej rreth 12 metrash.
Sipas informacioneve paraprake, gruaja rreth 60 vjeçe ndodhej për vizitë në zonën historike, kur dyshohet se ka humbur ekuilibrin dhe ka rënë nga muri mbrojtës i kalasë.
E plagosura është transportuar me urgjencë drejt Spitalit të Traumës në Tiranë, ku ndodhet në gjendje kritike për jetën dhe nën kujdesin intensiv të mjekëve.
Burime nga policia e Beratit bëjnë me dije se ngjarja ende nuk është konfirmuar zyrtarisht, ndërsa pritet një reagim i plotë për të sqaruar rrethanat e aksidentit.
Ndërkohë, në rrjetet sociale po qarkullon një video e filmuar nga kalimtarë të rastit, e cila dyshohet se tregon momentet menjëherë pas ngjarjes.
