Sarandë/ Operacioni “Distanca”, arrestohet 27-vjeçari nga Patosi që transportonte 13 emigrantë të paligjshëm drejt BE-së
Finalizohet operacioni i koduar “Distanca”, nga Policia Kufitare Sarandë, duke goditur një rast të dhënies ndihmë për kalim të paligjshëm të kufijve.
Gjatë operacionit, u kap në flagrancë në fshatin Xarrë një 27-vjeçar banues në Patos, i identifikuar si E. Y., banues në Patos, i cili transportonte me automjet 13 emigrantë nga Egjipti, kundrejt pagesës.
Nga hetimet paraprake rezulton se emigrantët kishin hyrë ilegalisht në Shqipëri përmes kufirit me Greqinë dhe synonin të vijonin rrugën drejt vendeve të Bashkimit Europian.
Automjeti i përdorur për transportin e tyre është sekuestruar në cilësinë e provës materiale.
Policia bën me dije se vijojnë hetimet për zbardhjen e plotë të këtij rasti dhe identifikimin e personave të tjerë të përfshirë në këtë aktivitet kriminal.
Materialet procedurale i janë referuar Prokurorisë së Sarandës, për veprën penale “Ndihma për kalim të paligjshëm të kufijve”.
