Sherr për motive të dobëta në Vlorë, përplasen tre persona – dy të plagosur, humb jetën 63-vjeçari
Një ngjarje e rëndë është regjistruar mesditën e sotme në Vlorë, ku një konflikt për motive të dobëta ka degjeneruar në dhunë mes tre personave.
Sipas informacioneve paraprake, gjatë përplasjes janë përfshirë tre shtetas, të cilët dyshohet se njiheshin me njëri-tjetrin. Si pasojë e konfliktit, dy prej tyre janë transportuar me urgjencë drejt spitalit për të marrë ndihmë mjekësore.
Pavarësisht ndërhyrjes së mjekëve, një nga të plagosurit, shtetasi Ismail Aliaj, 63 vjeç, nuk ka mundur t’i mbijetojë plagëve dhe ka ndërruar jetë.
Forcat e policisë kanë mbërritur në vendngjarje dhe po punojnë për zbardhjen e plotë të rrethanave, si dhe për dokumentimin ligjor të ngjarjes.
Vlorë / Informacion paraprak
Sot, rreth orës 15:00, në vendin e quajtur “Rruga e Çipave”, dyshohet se pas një konflikti të çastit për motive të dobëta, shtetasi I. A., 63 vjeç, është goditur me grushte nga dy shtetas, tashmë të identifikuar nga shërbimet e Policisë dhe vijon puna për kapjen e tyre.
Si pasojë e dëmtimeve, shtetasi I. A, ka humbur ndjenjat dhe është transportuar në Spitalin Rajonal Vlorë, ku më pas ka ndërruar jetë.
Grupi hetimor ndodhet në vendngjarje dhe po punon intensivisht për sqarimin e plotë të rrethanave të ngjarjes.
