Dy turistë kroatë devijojnë lundrimin për shkak të motit të keq dhe problemeve shëndetësore, mbërrijnë në Vlorë për ndihmë
Dje rreth orës 17:30, një mjet lundrues tip skaf me flamur anglez ka mbërritur në portin e Vlorës, pasi dy shtetas kroatë në bord janë detyruar të devijojnë lundrimin për shkak të kushteve të përkeqësuara atmosferike dhe problemeve shëndetësore që u janë shfaqur gjatë udhëtimit.
Të nisur nga Korfuzi me destinacion Dubrovnikun, ata janë përballur me vështirësi në det të hapur, çka ka bërë të pamundur vijimin e rrugës sipas planit fillestar. Për këtë arsye, mjeti është kthyer drejt portit të Vlorës për asistencë.
Menjëherë pas mbërritjes, përmes një agjencie detare përfaqësuese është kërkuar ndihmë mjekësore, ndërsa dy turistët janë transportuar në Spitalin Rajonal të Vlorës, ku kanë marrë trajtimin e nevojshëm dhe ndodhen jashtë rrezikut për jetën.
