“Jam në rrugë nacionale, kam të drejtën time”/ Deklaratat e para të drejtuesit që përplasi për vdekje 7-vjeçarin në Mengël
Detaje të reja dalin nga ngjarja tragjike e ndodhur mëngjesin e sotëm në fshatin Mengël të Elbasanit, ku një fëmijë vetëm 7 vjeç humbi jetën pasi u përplas nga një automjet i drejtuar nga një 61-vjeçar me inicialet P.B.
Sipas dëshmive të personave që ndodheshin pranë vendit të ngjarjes, drejtuesi i mjetit ka dhënë deklaratat e para vetëm pak minuta pas aksidentit, duke pretenduar se po lëvizte me shpejtësi shumë të ulët.
“Ai tha se po ecte me 10 km/orë. U shpreh: ‘Jam në rrugë nacionale, kam të drejtën time, po ecja me 10 km/h’”, ka treguar një banor i zonës për News24.
Banori ka ngritur gjithashtu shqetësimin për sigurinë në këtë segment rrugor, duke theksuar se zona konsiderohet problematike dhe se raste aksidentesh janë regjistruar edhe më parë.
Ndërkohë, policia po vijon hetimet për zbardhjen e plotë të rrethanave të kësaj ngjarjeje të rëndë që tronditi komunitetin lokal.
