Procedohen shefi i Policisë dhe shefi i Regjimit në IEVP Fier, arrestohet një i dënuar për narkotikë brenda burgut
Kontrollet e zhvilluara në Institucionin e Ekzekutimit të Vendimeve Penale (IEVP) Fier kanë nxjerrë në pah shkelje dhe problematika të lidhura me futjen dhe qarkullimin e sendeve të ndaluara brenda institucionit, ndërsa për rastin kanë nisur edhe procedime penale ndaj punonjësve të burgut.
Gjatë kontrollit të fundit të zhvilluar në Godinën A të IEVP Fier, autoritetet arrestuan shtetasin A.M., i dyshuar për veprat penale “Prodhim dhe shitje narkotikësh” si dhe “Futja dhe mbajtja e sendeve të ndaluara në IEVP”. Sipas të dhënave zyrtare, ai po vuan një dënim prej 12 vitesh burg për veprën penale “Vrasje me dashje”.
Paralelisht me arrestimin e të dënuarit, është vendosur nisja e procedimit penal në gjendje të lirë për veprën penale “Shpërdorimi i detyrës” ndaj gjashtë punonjësve të IEVP Fier. Mes personave të proceduar ndodhen edhe drejtues të rëndësishëm të institucionit, si shefi i Policisë dhe shefi i Regjimit të Brendshëm.
Sipas njoftimit të Drejtorisë së Përgjithshme të Burgjeve, procedimi penal ka nisur për:
A.H – Shef i Policisë në IEVP Fier
N.H – Shef i Regjimit të Brendshëm
A.M – Specialist Policie
A.M – Kontrollor
O.K – Kontrollor
R.S – Kontrollor
Kontrollet në institucionet e vuajtjes së dënimit zhvillohen periodikisht dhe në mënyrë të befasishme, me qëllim evidentimin e telefonave celularë, lëndëve narkotike, mjeteve të ndaluara dhe sendeve të tjera që cenojnë sigurinë e institucionit.
Ndërkohë, kontrollet po vijojnë edhe në IEVP Shkodër, ku gjatë verifikimeve në ambientet e brendshme janë gjetur tre aparate celularë, për të cilët janë kryer procedurat përkatëse dhe janë njoftuar strukturat kompetente.
