UGSH: Sulmet ndaj gazetarëve gjatë protestave dhe në rrjete sociale përbëjnë akt kriminal, kërkohet ndërhyrje e institucioneve
Unioni i Gazetarëve Shqiptarë (UGSH) ka ngritur shqetësimin për rritjen e gjuhës denigruese, sulmeve dhe agresionit verbal ndaj gazetarëve në rrjetet sociale dhe gjatë protestave të fundit në vend.
Sipas Unioni i Gazetarëve Shqiptarë, ndonëse protestat qytetare janë një shprehje e rëndësishme e lirisë së fjalës dhe një element që forcon demokracinë, një pjesë e reagimeve online ndaj gazetarëve ka kaluar në linçim publik dhe gjuhë urrejtjeje.
UGSH thekson se nga monitorimet e kryera janë evidentuar mbi 20 gazetarë me përvojë të gjatë në media, të cilët janë bërë objekt i sulmeve të vazhdueshme në rrjetet sociale për shkak të qëndrimeve dhe analizave të tyre profesionale.
Sipas Unionit, këto sulme shfaqen në formën e komenteve fyese, memeve denigruese, etiketimeve dhe fushatave të organizuara bullizuese, të cilat shpesh zhvillohen nga përdorues anonimë apo grupe të koordinuara.
UGSH vlerëson se një sjellje e tillë nuk mund të konsiderohet kritikë e lirë, por përbën, sipas tij, linçim publik dhe agresion virtual që dëmton lirinë e medias dhe klimën demokratike.
“Gjuha e urrejtjes dhe linçimi ndaj gazetarëve është një akt anticivil dhe kriminal dhe duhet të ndëshkohet,” thuhet në reagim.
Unioni i Gazetarëve Shqiptarë i bën thirrje Policisë së Shtetit dhe prokurorisë që të intensifikojnë hetimet për rastet më të rënda të sulmeve kibernetike dhe të ndërmarrin masa ndaj personave të identifikuar.
Po ashtu, UGSH u kërkon gazetarëve të denoncojnë çdo rast të agresionit online dhe apelon për një reagim të përbashkët profesional kundër këtij fenomeni, përfshirë edhe raportimin e llogarive abuzive në platformat e rrjeteve sociale.
Unioni thekson se mbrojtja e gazetarëve dhe garantimi i lirisë së shprehjes janë elemente thelbësore për funksionimin e një shoqërie demokratike dhe për ruajtjen e standardeve të debatit publik.
