Aksident në aksin Fier–Levan, plagosen dy drejtues mjetesh
Një aksident rrugor ka ndodhur pak minuta më parë në aksin Fier–Levan, pranë Qafës së Koshovicës.
Dy automjete janë përplasur me njëri-tjetrin dhe, si pasojë e përplasjes së fortë, kanë mbetur të plagosur dy drejtuesit e mjeteve. Të lënduarit janë transportuar me urgjencë drejt Spitalit Rajonal të Fierit, ku po marrin ndihmën e nevojshme mjekësore.
Në vendngjarje kanë mbërritur shërbimet e Policisë dhe grupi hetimor, të cilët po punojnë për zbardhjen e shkaqeve të aksidentit, ndërsa po marrin masa edhe për normalizimin e qarkullimit në këtë segment rrugor.
Aksi Fier–Levan, veçanërisht zona pranë Qafës së Koshovicës, konsiderohet një nga pikat problematike për aksidentet rrugore. Gjatë sezonit veror, fluksi i lartë i automjeteve rrit ndjeshëm rrezikun e ngjarjeve të tilla.
