Gara për postet drejtuese në PD: Korreshi sfidon Nokën për Sekretar të Përgjithshëm
Këshilli Kombëtar i Partisë Demokratike zhvillon sot zgjedhjet për strukturat drejtuese të partisë. Vëmendja kryesore është përqendruar te gara për postin e Sekretarit të Përgjithshëm, ku përballë sekretarit në detyrë, Flamur Noka, kandidon deputeti i Fierit, Saimir Korreshi.
Korreshi vendosi të hynte në garë vetëm në momentet e fundit. Më herët ishte përfolur edhe emri i deputetit të Elbasanit, Blendi Himçi, si rival i Nokës, por në fund kandidatura e vetme përballë tij mbeti ajo e deputetit fierak.
Ndërkohë, kryetari i PD-së, Sali Berisha, prezantoi edhe kandidatët për postet e tjera drejtuese. Gazment Bardhi dhe Agron Gjekmarkaj vijojnë të mbeten nënkryetarë të partisë, ndërsa gara më e fortë për vendin e tretë të nënkryetarit pritet të zhvillohet mes Belind Këlliçit dhe Luçiano Boçit.
Po ashtu, Këshilli Kombëtar do të votojë edhe për postet e sekretarëve të departamenteve të ndryshme të partisë, mes të cilëve përfshihen organizimi, dixhitalizimi, burimet njerëzore, çështjet ligjore, integrimi europian, pushteti vendor, diaspora, aksioni qytetar dhe fusha të tjera.
