“Washington Post”: Shqipëria nuk është thjesht një alternativë e lirë, por një destinacion me identitetin e saj
Shqipëria po tërheq gjithnjë e më shumë vëmendjen e mediave ndërkombëtare si një nga destinacionet turistike më tërheqëse në Evropë. Në një reportazh të publikuar nga The Washington Post, vendi vlerësohet jo si një alternativë më e lirë e Italisë, Greqisë apo Kroacisë, por si një destinacion me identitet të veçantë dhe autenticitet të rrallë.
Gazetarja përshkruan përvojën e saj gjatë një udhëtimi njëjavor në veri dhe jug të Shqipërisë, duke theksuar se natyra e paprekur, mikpritja tradicionale dhe kultura lokale janë elementët që e bëjnë vendin unik.
Udhëtimi nis në Qarkun e Shkodrës, ku liqenet, fshatrat tradicionale dhe bujtinat familjare krijojnë një atmosferë larg turizmit masiv. Një nga ndalesat ishte Bujtina Rragam, ku autorja veçon mikpritjen shqiptare, gatimet tradicionale dhe qetësinë e natyrës si ndër momentet më të paharrueshme.
Më pas, reportazhi zhvendoset në bregdetin e jugut, në Himarë dhe Livadh, ku plazhet me ujëra të kristalta vazhdojnë të tërheqin turistë nga e gjithë bota. Megjithatë, artikulli vëren se zhvillimi i shpejtë turistik po ndryshon peizazhin e zonës, me hotele, resorte dhe projekte të reja infrastrukturore përgjatë vijës bregdetare.
Sipas të dhënave të cituara në reportazh, Shqipëria priti mbi 11.6 milionë vizitorë të huaj gjatë vitit 2024, një rritje prej më shumë se 82% krahasuar me vitin 2019. Autoritetet shqiptare synojnë zhvillimin e një turizmi të qëndrueshëm, duke shmangur mbingarkesën që karakterizon disa destinacione të njohura mesdhetare.
Në përfundim, The Washington Post thekson se Shqipëria nuk duhet krahasuar me vendet fqinje, pasi vlera e saj qëndron pikërisht te identiteti autentik. Sipas autores, kujtimet më të bukura nuk lidhen vetëm me plazhet mahnitëse, por edhe me mikpritjen, jetën në fshat, gatimet tradicionale dhe përvojat unike që e bëjnë Shqipërinë një destinacion më vete.
