Skender Hita në terren për sigurinë rrugore: 1,100 gjoba në një javë, shpejtësia deri në 230 km/h
Drejtori i Përgjithshëm i Policisë së Shtetit, Skender Hita, ka inspektuar nga terreni masat e ndërmarra nga Policia Rrugore për rritjen e sigurisë në rrugë, ndërsa ka kërkuar intensifikimin e kontrolleve dhe përdorimin e mjeteve inteligjente për evidentimin e shkeljeve.
Hita ishte i pranishëm në aksin interurban kryesor “Rrogozhinë-Durrës”, ku Policia Rrugore po monitoron lëvizjen e automjeteve përmes mjeteve inteligjente që matin automatikisht shpejtësinë.
Gjatë inspektimit, Drejtori i Policisë Rrugore, Perlat Vatoci, informoi kreun e Policisë së Shtetit për mënyrën se si po kryhen kontrollet dhe për përdorimin e mjeteve inteligjente në akset kryesore të vendit.
Sipas Policisë, mjete të tilla janë të dislokuara edhe në Rrugën e Kombit dhe në akse të tjera kryesore, duke evidentuar automatikisht drejtuesit që tejkalojnë normat e lejuara të shpejtësisë.
Shifrat e bëra publike nga Skender Hita tregojnë përmasat e shkeljeve. Vetëm gjatë kësaj jave janë vendosur 1,100 masa administrative për tejkalim të shpejtësisë, ndërsa shpejtësia e evidentuar në disa raste ka arritur deri në 230 km/h.
Ndërkohë, gjatë një viti, në të gjithë territorin e vendit, 1,075 drejtuesve të automjeteve u është hequr leja e drejtimit, pasi kanë humbur pikët e saj. Gjithashtu, janë proceduar 1,060 raste për drejtim të automjeteve pa leje drejtimi.
Hita njoftoi gjithashtu se së shpejti do të vihen në funksion kamerat e Qendrës Kombëtare të Monitorimit të Trafikut Rrugor. Kamerat do të integrohen me sistemet e Policisë, duke mundësuar një kontroll më të plotë dhe evidentim më të saktë të shkeljeve në rrugët kryesore dhe interurbane.
Kreu i Policisë së Shtetit theksoi se siguria rrugore mbetet një nga prioritetet kryesore të institucionit dhe se kontrollet nuk kanë si qëllim vetëm ndëshkimin e shkelësve.
“Nuk është në fokusin tonë që ne vetëm të evidentojmë shkelje. Në fokusin tonë është të ndërgjegjësojmë qytetarët, të parandalojmë këto shkelje rrugore dhe të mos kemi aksidente fatale”, u shpreh Hita.
Ai u bëri apel drejtuesve të automjeteve që të mos përdorin telefonin gjatë drejtimit të mjetit, të mos drejtojnë nën efektin e alkoolit apo lëndëve narkotike dhe të respektojnë kufijtë e shpejtësisë.
“Shpejtësia vret”, paralajmëroi Skender Hita, duke e mbyllur apelin me mesazhin: “Një rregull i respektuar, është një jetë e shpëtuar më shumë.”
