E rëndë në Lushnjë/ Djali dyshohet se vrau prindërit në banesë, policia në ndjekje të autorit
Një ngjarje e rëndë ka tronditur mbrëmjen e sotme fshatin Zhym, në Njësinë Administrative Krutje, Lushnjë, ku një djalë dyshohet se ka vrarë prindërit e tij brenda banesës.
Sipas të dhënave paraprake, autori i dyshuar është identifikuar si Florjan Dalladaku. Ai dyshohet se ka qëlluar me armë ndaj prindërve të tij, duke shkaktuar një ngjarje të rëndë familjare.
Pas krimit, autori dyshohet se është larguar me automjet. Policia ka nisur menjëherë ndjekjen e tij dhe ka ngritur postblloqe në disa akse rrugore, me qëllim lokalizimin dhe kapjen e tij.
Në vendngjarje kanë mbërritur forcat e Policisë dhe grupi hetimor, të cilët po punojnë për dokumentimin e plotë të rrethanave dhe zbardhjen e motivit të ngjarjes.
Sipas informacioneve paraprake, autori dyshohet se kishte probleme të shëndetit mendor, por kjo mbetet për t’u konfirmuar zyrtarisht nga autoritetet.
Detaje të tjera priten në vijim, ndërsa policia vijon operacionin për kapjen e autorit të dyshuar.
