Dhimbje e madhe!/ Ndahet nga jeta në moshën 25-vjeçare “Lea” e Alban Skënderajt
Artistja nga Kosova, Rinesa Qeriqi, e njohur për publikun me emrin artistik Rinesancë, është ndarë nga jeta në moshën 25-vjeçare. Lajmi i trishtë është bërë i ditur nga familjarët e këngëtares, e cila prej kohësh po përballej me një tumor në tru. Rinesa njihet gjithashtu dhe për pjesëmarrjen e saj si imazh në klipin e këngës “Lea”, e Alban Skënderajt.
Pavarësisht përpjekjeve dhe trajtimeve mjekësore, artistja e re nuk arriti ta mposhtte sëmundjen.
Për shkak të gjendjes së saj shëndetësore, më herët ishte organizuar edhe një aktivitet bamirësie për mbledhjen e fondeve, me qëllim përballimin e shpenzimeve të trajtimit mjekësor.
Lajmin për ndarjen e saj nga jeta e ka ndarë motra e këngëtares përmes një mesazhi emocionues, ku i ka dhënë lamtumirën e fundit.
“Mëngjesi i sotëm na erdhi pa ty Rina jonë. Do të mbetesh gjithmonë në zemrat tona, deri në përjetësi. Të duam fort, unë, mami, babi, Buna e Froni. Pusho e qetë shpirt i bardhë”, shkroi motra e saj.
Rinesancë ishte e përqendruar kryesisht në muzikën hip-hop dhe rap, duke u dalluar për tekstet personale dhe mënyrën shprehëse me të cilën përcillte përjetimet e saj përmes muzikës.
Në dhjetor të vitit 2025, ajo kishte publikuar albumin me 12 këngë, të titulluar “Muzikë Mbijetese”, një nga projektet e saj të fundit muzikore.
Artistja u nda nga jeta në moshë të re, duke lënë pas krijimtarinë e saj muzikore dhe kujtimet te familjarët e njerëzit që e kanë ndjekur gjatë rrugëtimit artistik.
