Tragjike në Spanjë/ Dy trena përplasen me njëri-tjetrin, dyshohet për dhjetëra viktima
Një aksident i rëndë hekurudhor është regjistruar mëngjesin e kësaj të mërkure në Spanjë, ku dy trena pasagjerësh janë përplasur pranë qytetit të Toledos, në zonën mes Los Yébenes dhe Urda.
Ngjarja ka ndodhur rreth orës 09:00, në linjën hekurudhore që lidh Madridin me Andaluzinë. Në aksident janë përfshirë një tren i shpejtësisë së lartë AVE, i kompanisë Renfe, dhe një tren i kompanisë Iryo, të cilët po udhëtonin në drejtime të kundërta.
Sipas raportimeve të mediave spanjolle, si pasojë e përplasjes, dy vagonë kanë dalë nga shinat dhe kanë përfunduar në një terren të pjerrët pranë hekurudhës. Në vendngjarje janë angazhuar ekipet e emergjencës, zjarrfikësit dhe disa njësi mjekësore, përfshirë helikopterë të urgjencës.
Dëshmitarët kanë raportuar për pasoja të rënda nga aksidenti, ndërsa autoritetet po punojnë për të përcaktuar numrin e viktimave, ku pretendohet të jenë të paktën 10.
Për shkak të aksidentit, kompania që administron infrastrukturën hekurudhore në Spanjë, ADIF, ka pezulluar qarkullimin e trenave të shpejtësisë së lartë në linjën Madrid-Andaluzia.
