Lindita Nikolla: Situata e tensionuar në veri të Kosovës nuk i shërben dialogut Prishtinë-Beograd
Kryetarja e Kuvendit Lindita Nikolla ka reaguar ndaj situatës së tensionuar në veri të Kosovës. Përmes një postimi në Facebook, Nikolla shprehet se kjo situatë e krijuar nuk i shërben procesit të normalizimit mes Kosovës dhe Serbisë.
Ajo shkruan se e vetmja mënyrë drejt njohjes së Kosovës dhe paqes në rajon, është vazhdimi i dialogut Prishtinë-Beograd, në të cilin janë përfshirë SHBA dhe BE për të monitoruar dhe për të bërë të mundur normalzimin e marrëdhënieve mes dy vendeve.
“Tensionimi i situatës në Veri të Kosovës nuk i shërben avancimit të procesit të normalizimit të marrëdhënieve mes dy vendeve.
Kosova dhe Serbia, me mbështetjen e miqve e partnerëve tanë strategjikë, ShBA dhe BE, kanë hyrë në dialog për normalizimin e marrëdhënieve dhe duhet të vazhdojnë këtë dialog. Kjo është e vetmja rrugë drejt njohjes së ndërsjelltë, zhvillimit, demokracisë, paqes e bashkëpunimit në rajon”, shkroi Lindita Nikolla.
Kujtojmë që situata në veri të Kosovës është tensionuar, pasi disa qytetarë serbë janë mbledhur para ndërtesave komunale në veri për të penguar hyrjen e kryetarëve në zyra. Si pasojë pesë persona janë lënduar nga përplasja mes autoriteteve dhe protestuesve.
