Franca dhe Gjermania kanë kërkuar zgjedhje të reja në veri të Kosovës pas tensioneve të ditëve të fundit. Lajmi është konfirmuar nga presidenti francez, Emmanuel Macron.
“Franca dhe Gjermania u kërkuan udhëheqësve të Kosovës dhe Serbisë të organizojnë zgjedhje të reja në rajonet e prekura nga trazirat sa më shpejt që të jetë e mundur”, është shprehur Macron.
Sipas tij, në javët e ardhshme do të ketë një “vendim të qartë” për situatën në veri, gjë për të cilën u pajtuan gjatë takimeve me kancelarin gjerman, Olaf Scholz edhe Vjosa Osmani dhe Aleksandër Vuçiç.
Presidentja e Kosovës dhe Vuçiç mbajtën ditën e sotme takime të ndara me udhëheqësit evropianë, në margjinat e samitit të Komunitetit Politik Evropian në kryeqytetin moldav, Kishinau.
Situata në veri të Kosovës u tensionua më 26 maj, kur policia e Kosovës ndihmoi kryetarët shqiptarë të komunave me shumicë serbe të hyjnë në zyrat komunale, përkundër rezistencës së banorëve serbë./abc
