LAJM I FUNDIT/ Kamioni përplas ambulancën në aksin Fier – Lushnjë, ndërron jetë një person (EMRI)
Dashamir Koçaj 77 vjeç, ka humbur jetën gjatë kohës që po transportohej me ambulancë për në Tiranë si pasojë e një aksidenti të ndodhur pak minuta më parë në kryqëzim të autostradës Lushnjë-Fier, në vendin e quajtur “Rotondo e Savres”.
Burime bëjnë me dije se një kamion është përplasur me ambulancën e cila ishte duke transportuar 77-vjeçarin në Tiranë.
Mësohet se i ndjeri nuk ka mundur t’i mbijetojë lëndimeve dhe ka humbur jetën.
Të lënduar kanë mbetur drejtuesi i ambulancës, infermierja dhe vajza e cila po shoqëronte të atin në gjendje të rëndë shëndetësore.
Në vendngjarje kanë shkuar menjëhere policia dhe grupi hetimor për të zbardhur dinamikën e këtij aksidenti të rëndë.
Lushnjë
Rreth orës 14:50, në aksin rrugor “Lushnjë-Fier”, në vendin e quajtur “Rotondo e Savrës” ka ndodhur një aksident rrugor ku janë përplasur automjeti tip “Kamion” me drejtues shtetasin L. Gj. 31 vjeç, dhe autombulanca me drejtues shtetasin F. R., 54 vjeç, në të cilën ndodhej pacienti D. K., 77 vjeç, i cili ka ndërruar jetë.
Gjithashtu, janë dëmtuar dhe ndodhen në spital, në kujdesin e mjekëve, drejtuesi i autombulancës, infermieri, shtetasi E. B., 33 vjeç dhe vajza e pacientit që ndërroi jetë, shtetasja E. A., 37 vjeçe.
Grupi hetimor ndodhet në vendngjarje dhe nën drejtimin e Prokurorit po vijon veprimet për përcaktimin e shkakut të aksidentit si edhe po kryen veprimet procedurale me 2 drejtuesit e automjeteve.
