Tragjedia në Sarandë/ Ashensori zuri poshtë kamarierin një muaj më parë, arrestohet pronari i lokalit të natës
Një muaj më parë, një tragjedi ndodhi në një lokal nate në Sarandë. 17-vjeçari Antonio Delilaj humbi jetën pasi pajisja që përdorte lokali për transportimin e mallrave e zuri poshtë.
Ndërkohë, këtë të mërkurë, ka rënë në prangat e policisë pronari i lokalit të natës. Mbi 37-vjeçari rëndon masa e sigurisë “Arrest në burg”, për veprën penale “Shkelja e rregullave të mbrojtjes në punë”.
Njoftimi i Policisë:
Qafë Botë, Sarandë/Kapet dhe vihet në pranga pronari i lokalit ku një muaj më parë, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Shërbimet e Stacionit të Policisë Kufitare Qafë Botë, si rezultat i kontrolleve të shtuara për goditjen e krimeve kufitare dhe kapjen e shtetasve në kërkim, kanë kapur dhe ndaluar shtetasin në kërkim S. I., 37 vjeç, banues në Sarandë.
Gjykata e Shkallës së Parë e Juridiksionit të Përgjithshëm Sarandë ka caktuar ndaj këtij shtetasi, masën e sigurisë “Arrest në burg”, për veprën penale “Shkelja e rregullave të mbrojtjes në punë”, pasi më datë 26.08.2023, në lokalin në pronësi të tij, për shkak të këputjes së kavos së ashensorit, humbi jetën një 17-vjeçar i punësuar në këtë lokal.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
