Aksident i frikshëm në SHBA, përplasen 158 mjete, numri i viktimave vijon të rritet (VIDEO)
Një aksident i rëndë ka ndodhur në Luziana, SHBA, ku kanë humbur jetën 7 persona, ndërsa 25 të tjerë kanë mbetur të plagosur. Sipas mediave të huaja mësohet se 158 makina u përplasën si pasojë e mjegullës së rënduar në atë zonë.
Policia e Shtetit në Luziana tha se aksidenti ku u përfshinë të paktën 158 automjete, ndodhi mëngjesin e së hënës për shkak të kushteve të mjegullës së dendur, ndërkohë fatkeqësisht numri i viktimave pritet të rritet pasi efektivët e policisë janë ende duke lëvizur automjetet.
Disa prej automjeteve menjëherë pas përplasjes u përfshinë nga flakët e zjarrit, ndërkohë një nga mjetet që u përfshi në askident ishte një kamion cisternë që mbante “lëng të rrezikshëm”.
Njëri nga shoferët ka treguar për mediat vendase se: Unë kisha shtypur frenat për të ngadalësuar shpejtësinë kur një automjet tjetër më goditi. Gjithçka që mund të dëgjoja për 30 minuta ishte përplasja e automjeteve.
Videot e publikuara në rrjetet sociale tregojnë makina të shkatërruara dhe të grumbulluara njëra mbi tjetrën. Gjatë ditëve të fundit, Shërbimi Kombëtar i Motit ka paralajmëruar për mjegull të shtuar në atë zonë, si pasojë e zjarreve kënetore që ndodhin aty pranë. Policia e Shtetit këshilloi drejtuesit e mjeteve që të përdorin dritat e shkurtra nëse nuk shohin të paktën 500 metra para tyre.
