Fier/ U kap me armë zjarri në automjet, vihet në pranga 30-vjeçari (EMRI)
Një 30-vjeçar ka rënë në prangat e policisë në Fier pasi u kap me armë zjarri pa leje.
Vjoni Gjoka banues në fshatin Vreshtas, gjatë kontrollit nga policia mbrëmjen e djeshme në automjetin që drejtonte iu gjet dhe sekuestrua një armë zjarri.
Më pas policia shkoi dhe në banesën e 30-vjeçarit ku u gjet edhe një armë tjetër dhe municion luftarak të cilat u sekuestruan.
Njoftimi i Policisë:
Fier/Operacione të njëpasnjëshme, për të goditur rastet e armëmbajtjes pa leje, me qëllim garantimin e sundimit të ligjit në territor.
Finalizohet operacioni policor i koduar “Risku”. Sekuestrohen 2 armë zjarri dhe municion luftarak.
Kishte 2 pistoleta, në automjet dhe në banesë, kapet në flagrancë dhe vihet në pranga 30-vjeçari.
Si rezultat i kontrolleve në të gjithë territorin e qarkut, të kryera në bazë të informacioneve nga inteligjenca policore dhe në vijim të megaoperacionit “Sundimi i ligjit”, shërbimet e Komisariatit të Policisë Fier organizuan dhe finalizuan operacionin policor të koduar “Risku”, gjatë të cilit u godit një tjetër rast i posedimit të kundërligjshëm të armëve të zjarrit.
Shërbimet e Policisë, për këtë rast, arrestuan në flagrancë shtetasin V. Gj., 30 vjeç, banues në Vreshtas, pasi nga kontrollet e kryera në automjetin që ky shtetas drejtonte gjatë natës, në fshatin Cakran, dhe në banesën e tij, u gjetën dhe u sekuestruan në cilësinë e provës materiale 2 armë zjarri pistoleta dhe municion luftarak.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme procedurale.
