Banesa në Gramsh përfshihet nga zjarri, gjyshi futet mes flakëve dhe shpëton mbesën
Dy banesa në fshatin Kukur të Gramshit pasditen e djeshme u përfshinë nga flakët. Ngjarja ndodhi pasditen e djeshme rreth orës 16.00, ku si pasojë e flakëve u shkrumbuan të dyja banesat.
Flakët ranë në njërën nga banesat si pasojë e një shkëndije elektrike, dhe më pas kanë përfshirë edhe banesën ngjitur. E teksa banesa ishte përfshirë nga flakët, Zaim Meci pa u menduar dy herë u fut mes flakëve për të nxjerrë nga banesa mbesën 8-vjeçare.
“Isha me bagëti aty afër banesës kur pashë që në çatinë e shtëpisë dilnin shtëllunga tymi e flakë, shkova aty dhe pashë që njerëz me kova uji mundoheshin të fiknin flakët, pjestarët e familjes time që qanin e ulërinin ishte një tmerr.
Dikush më tha që është një fëmijë brenda, nuk kuptoheshin të qarat e mbesës brenda, jam lagur me ujë e me një lekurë bagëtie u futa mes flakëve. Shkova tek dhoma ku mbesa qante e strukur nën një tavolinë buke, as vet se di sesi dola. Falenderoj Zotin që mbesa shpëtoi”, ka rrëfyer gjyshi për “Tv Klan”.
Gjyshi i prekur është shprehur se tashmë kanë mbetur vetëm me rrobat e trupit, teksa bëri thirrje për ndihmë.
