E Rëndë në Lushnjë: Gjendet Trupi i Pajetë i një 21-Vjeçarit në Kanal Vaditës
Në fshatin Çukas i Ri, Lushnjë, pas kërkimeve intensive të kryera nga polumbarët e Repartit Special Renea, është gjetur trupi i pajetë i një 21-vjeçari, i cili dyshohet se është mbytur mbrëmjen e djeshme. Ngjarja tragjike u raportua nga shtetasi A. C., banues në fshatin Barbullinjë, i cili njoftoi Policinë e Lushnjës për humbjen e kontakteve me djalin e xhaxhait të tij, shtetasin M. C., 21 vjeç, i cili vuante nga epilepsia.
Pas kallëzimit të bërë mbrëmjen e djeshme, kërkimet për gjetjen e 21-vjeçarit filluan menjëherë. Sot paradite, me ndihmën e polumbarëve, trupi i pajetë u gjet dhe u nxor nga një kanal vaditës në fshatin Çukas i Ri. Grupi hetimor është duke punuar për sqarimin dhe dokumentimin e plotë ligjor të rrethanave të kësaj ngjarjeje tragjike.
