Shtyhet gjyqi për çështjen “Gërdeci”, ish-ministri Fatmir Mediu i kërkoi Gjykatës të ripërsërisë akt ekspertimin e dëmit ekonomiko-financiar
Ish-ministri i Mbrojtjes, Fatmir Mediu, i kërkoi Gjykatës së Posaçme të ripërsërisë pjesërisht akt ekspertimin e dëmit ekonomiko financiar të çështjes “Gërdeci”.
Seanca mbaroi rreth orës 16:00, ndërsa e radhës është caktuar më datë 18.
Sipas avokatëve të Mediut, ekspertët nuk kanë marrë parasysh një shkresë të kombinatit mekanik të Poliçanit, të vitit 2007, ku përllogariten kostot e demontimit të municioneve, duke i konsideruar të dhënat e saj të falsifikuara.
Gazetarja Anila Hoxha raporton për Top Channel se avokati Henrik Ligori i tha gjykatës se mbi dyshimet për falsifikim janë kallëzuar penalisht tre zyrtarë të kombinatit, por më pas gjykata e Beratit, ajo e Apelit Vlorë dhe Gjykata e Lartë kanë pushuar akuzën ndaj tyre.
Në këto kushte, tha avokati Ligori, të dhënat e shkresës në fjalë kanë qenë të sakta.
Në vijim, avokati i kërkoi gjykatës të marrë në cilësinë e provës tre vendimet gjyqësore dhe të urdhërojë kryerjen e një akt-ekspertimi të ri të pjesshëm.
