“Shtohen lavazhet me pronarë shqiptarë në Greqi”, media greke: Janë qendra të pastrimit të parave të mafies, shfaqen si investitorë të miliona eurove
Shumë lavazhe funksionojnë si njësi “pastrimi parash”, kryesisht të mafies shqiptare sot në Athinë, sipas burimeve nga Policia Greke, AADE dhe Ministria e Financave të këtij shteti. Kështu shkruan media greke “Pronews” në një artikull për këtë çështje, duke vënë në shënjestër shqiptarët.
“Sipas një burimi të Drejtorisë së Policisë Athinë, “Ky aktivitet i veçantë ekonomik ofrohet fjalë për fjalë për “pastrim”: Është një ofrim i paprekshëm shërbimesh dhe mafia shqiptare, e cila kontrollon aktivitetet kriminale si droga dhe prostitucioni, ka gjetur një mënyrë të re për të “pastruar” shuma të mëdha parash”.
Ka lavazhe që raportojnë deri në 500 makina në ditë, sidomos në periferitë jugore. Por edhe kur nuk pastrojnë para, atëherë i shmangen taksave, pasi nuk u presin asnjëherë faturat klientëve të njohur. Në një lavazh në zonën e Glyfadhës së poshtme, e cila “lindi” pranë një restoranti luksoz, më shumë se 300 makina, shumica ultra luksoze dhe me targa të huaja, duken të lahen çdo ditë.
Objekti është mbresëlënës mes klubit dhe restorantit dhe po aq mbresëlënës se si u lejua të funksiononte, qoftë edhe si një objekt “me shqetësim të ulët”, pranë një sheshi qendror. Këtu po hetohen firmat e hedhura nga shërbimet qeveritare, si dhe nga Bashkia e Glyfadhës, të cilat kanë lejuar funksionimin fillestar dhe zgjerimin e mëpasshëm të lavazhit specifik.
Një tjetër lavazh në të cilin është evidentuar ekzistenca e “dorës së padukshme” të mafies shqiptare në të njëjtën zonë por në Glyfadhën e sipërme, është identifikuar se kishte marrëdhënie me organizata kriminale.
Janë identifikuar tre “qendra larëse” të tjera shqiptare, me prova të forta, në zonën e Pireut dhe dy të tjera në Petrou Ralli, dy në Mesogeia dhe një tjetër në Nikaia, si dhe dy të tjera, një në Ilioupoli dhe një në periferitë veriore.
Në të gjitha rastet, në licencimin e tyre përfshihen njerëz të pushtetit vendor, ndërkohë që në asnjë rast pronarët, shqiptarë apo të huaj të tjerë, nuk kanë justifikuar investimin, që shpesh shkon deri në qindra mijëra euro.
Gjithashtu, në dy raste, punëtorët shqiptarë të lavazheve janë konstatuar se janë të lidhur me bandat e vjedhjeve të makinave, të cilat i lajnë në lavazhe dhe më pas i vjedhin teksa kopjojnë çelësat.
Gjithashtu, ka të dhëna të qarta se pronarët e padukshëm janë të dënuar shqiptarë që kontrollojnë bizneset nga burgu.
Po hetohet edhe çështja e përfshirjes apo korrupsionit të drejtuesve të pushtetit vendor, por edhe të zyrtarëve të policisë të Drejtorive vendore, pasi ka raste të shkeljeve flagrante urbanistike dhe shëndetësore, për të cilat janë mbyllur sytë.
