Bënin kërdinë me vjedhje, të pajisur me çdo mjet të mundshëm për të realizuar plaçkitjet e banesave dhe bizneseve në Itali, arrestohen 2 ‘skifterët’ shqiptarë….
Karabinierët e Ardeas ndërhynë në fshatin Tor San Lorenzo (Lazio), pasi morën sinjalizimin se po kryheshin vjedhje shtëpish. Sapo hasën efektivët, të dyshuarit lanë në mes grabitjen, por u kapën në ndjekje e sipër. Të dy ishin me precedentë të mëparshëm penalë. Si prova u sekuestruan jo vetëm sende të vjedhura, por edhe valixhe profesionale, me të gjitha veglat e mundshme (në foto).
Ndërhyrja u krye dy ditë më parë. Media italiane raporton se hajdutët u përpoqën me çdo kusht të arratiseshin, duke kërcënuar me kaçavida karabinierët, por pa sukses.
Kërkimi solli mjaft surpriza. Në automjetin – të vjedhur disa muaj më parë – karabinierët gjetën një arsenal të vërtetë mjetesh për vjedhje, si leva, pinca, trapano, troko, madje edhe një mjet pune kazmë dhe një ndezës për shpërthim të lokalizuar.
Materiale që provojnë dyshimet për qëllimet e dy shqiptarëve, emrat e të cilëve nuk u publikuan, ndoshta tashmë gati për të goditur në shtëpi të tjera. Mes objekteve të gjetura, edhe malli i vjedhur dhe i kthyer te pronari i ligjshëm.
