Operacion i SPAK: Masa sigurie për 21 persona, përfshirë figura publike dhe ish-zyrtarë. Detyrim paraqitje për dy gazetarët Artan Hoxha dhe Elton Qyno
Prokuroria e Posaçme (SPAK) ka njoftuar sot detaje mbi një operacion të gjerë kundër krimit të organizuar që po zhvillohet në Elbasan. Në kuadër të këtij hetimi, janë caktuar 21 masa sigurie, nga të cilat 18 janë arrest me burg. Mes të arrestuarve përfshihen një ish-gjyqtare dhe një zyrtar i lartë i policisë së shtetit, si dhe avokatja e grupit të Suel Çelës, Blerina Beqir, e cila është vendosur në arrest shtëpie.
Ndërkohë, dy gazetarë të njohur, Elton Qyno dhe Artan Hoxha, janë vendosur nën masën e detyrimit për paraqitje. Elton Qyno akuzohet për korrupsion pasiv në sektorin privat, ndërsa Artan Hoxha për pjesëmarrje në grup kriminal.
SPAK ka deklaruar se operacioni vijon për zbardhjen e plotë të aktivitetit kriminal dhe për të çuar para drejtësisë të gjithë personat e përfshirë. Ky rast pritet të ngjallë reagime të shumta, duke qenë se përfshin emra të njohur dhe zyrtarë të lartë.
