Zbulohet një tjetër “shtëpi bari” në Vaun e Dejës, shoqërohet pronari i objektit
Një “shtëpi bari” është zbuluar nga autoritetet policore në fshatin Naraç të Vaut të Dejës. Burime për mediat bëjnë me dije se bëhet fjalë për një magazinë, e cila ishte përshtatur për kultivim të bimëve narkotike me anë të llambave.
Nga informacionet paraprake mësohet se është shoqëruar në komisariat shtetasi Zef Sh., i cili është pronari i objektit që ishte kthyer në fermë kanabisi.
Autoritetet policore kanë gjetur në magazinë një sasi e thatë prej 150 kilogramë kanabis, e paketuar në thasë. Dyshohet se Zef. Sh, ka bashkëpunuar me 3 persona të tjerë.
Akoma nuk ka një njoftim zyrtar nga Policia, ndërsa detaje të tjera në lidhje me rastin priten në vijim.
Kujtojmë se pak ditë më parë u zbulua dhe një tjetër “shtëpi bari”, ku godina e braktisur e shkollës 9-vjeçare në fshatin Dush, ishte përshtatur për kultivimin e kanabisit. Në atë operacion u arrestua vetëm elektricisti i zonës.
