Erion Veliaj reagon përsëri nga burgu: “Akuzat ndaj meje janë të sajuara”
Ish-kryetari i Bashkisë së Tiranës, Erion Veliaj, ka reaguar nga burgu pas ndalimit të tij, duke mohuar akuzat për korrupsion dhe pastrim parash. Në një mesazh të publikuar nga mbështetësit e tij, Veliaj e cilëson çështjen kundër tij si një skenar të fabrikuar nga prokuroria dhe e kritikon ashpër prokurorin e çështjes.
“Nata e parë në qeli ka qenë e vështirë, i ndarë me forcë nga familja ime. Akuza për fshehje pasurie dhe pastrim parash është një trillim i bazuar në supozime të pavërteta,” shprehet ai.
Veliaj pretendon se shpenzimet që prokuroria i cilëson si luksoze janë të dokumentuara dhe të lidhura me aktivitetet e fondacionit kulturor të bashkëshortes së tij. Ai akuzon prokurorin për qasje të njëanshme dhe për tendencën për ta paraqitur atë si të korruptuar pa prova të besueshme.
Reagimi i tij vjen pas raportimeve mediatike dhe deklaratave të ndryshme politike mbi çështjen, ndërsa mbetet për t’u parë se si do të vijojë procesi gjyqësor ndaj tij.
Postimi i plotë i Veliajt:
Të dashur miq,
Natën e parë në qeli, i marrë forcërisht larg familjes dhe me idenë që sot në mëngjes im bir nuk do të shkonte në shkollë as me mua, as me të ëmën, e kam kaluar pa gjumë në sy. I vetmi ngushëllim ishte që nuk mund të shihja dhe as dëgjoja qenërinë, që me siguri më është vërsulur mbrëmë në studiot e kafshimeve dhe jargëve televizive.
Ndjesë për çfarë ju kanë dëgjuar veshët dje deri vonë dhe sot që në sabah në ato kanale gjirizi. Por, dua të jini të sigurt se historia që po më tregon mua si një kriminel të korruptuar, i cili ka fshehur pasuri dhe pastruar para bashkë me të shoqen, është e sajuar nga një individ pervers, prokurori i çështjes tonë.
Ai, për shembull, ka shkruar në akt-akuzën haluçinante se ime shoqe ka harxhuar mbi gjysëm milionë euro për blerje online fustanësh dhe bizhuterish. Ky pervers, që më pyeste mua për fustanet e gruas dhe më tregonte gjatë marrjes në pyetje se si shkonte kontrollonte gruan e tij në punë, nuk ka dashur t’ia dijë për shpjegimet e mia dhe të sime shoqeje. Blerjet online janë të gjitha të deklaruara dhe në një shumë disa herë më të vogël, janë bërë për shfaqjet artistike të fondacionit kulturor të sime shoqeje. Faturimi i asaj shume në një akt-akuzë, si një lumë parash i derdhur për luks, është një perversitet kriminal.
Kur i thosha se kjo ishte e vërteta dhe kur në fakt, në shtëpinë tonë nuk ka gjetur as fustane mijëra eurosh, as bizhuteri me ndonjë vlerë të veçantë, ai zvarranik si i dalë nga qenefët e dikurshëm të Sigurimit të Shtetit zgërdhihej dhe më tregonte se si i binte violinës kur ishte i vogël.
A ju duket rastësi që në të gjithë historinë e gojës së kërmës Sali, ky violinist i mbetur në tentativë është i vetmi individ që pasi e ka akuzuar si kriminel një ditë më parë, Saliu i ka kërkuar falje të nesërmen? Mua jo, se që të të kërkojë falje Saliu, do duhet realisht t’i bësh një shërbim të pamundur. Po kjo s’është akuzë, është vetëm një opinion.
Kalofshi mirë sot miq dhe kujt më beson i jam falenderues, kujt s’më beson i jam mirëkuptues.
