Të shtëna me armë jashtë gjykatës në Gjermani, qëllohen babai dhe vëllai i autorit të vrasjes së ish-boksierit shqiptar Besar Nimani
Sot në Gjykatën e Bielefeldit nisi gjyqi për vrasjen e ish-boksierit shqiptar, Besar Nimani (38 vjeç) por në momentin që filloi seanca, jashtë u dëgjuan të shtëna me armë zjarri. Krismat erdhën nga një automjet në lëvizje, raporton BILD.
Shënjestër e të shtënave kishin qenë babai dhe vëllai i autorit të vrasjes së Nimamit. I pari ka marrë një plumb në mushkëri dhe sipas autoriteteve ndodhet në gjendje kritike për jetën, ndërsa tjetri u qëllua në këmbë. Ndërkohë, dyshohet edhe për një të plagosur të tretë. Policia gjermane arrestoi autorin e të shtënave, ndërsa besohet se ai ka patur edhe bashkëpunëtor i cili ndodhet në kërkim.
Autori i dyshuar i krimit, Hüseyin Akkurt (38 vjeç), i cili u arrestua në Bruksel në mes të korrikut, është në gjyq. Ndërsa një i dyshuar i dytë është ende në arrati.
Ish-boksieri shqiptar nga Kosova, Besar Nimani u vra në 9 mars të vitit të kaluar në qytetin e Bielefeldit. Nimani u qëllua sapo doli nga një restorant. Vrasja e tij u hetua nga autoritetet si përplasje mes grupeve kriminale për larje hesapesh.
Nimani gjatë karrierës së tij si boksier profesionist ka zhvilluar 27 ndeshje, ku ka arritur që të fitojë 26 prej tyre, ndërsa ka pësuar vetëm një humbje.
