Shtyhet seanca për Veliajn/ Prokurorët kanë paraqitur prova të reja, kërkohet kohë për shqyrtimin e tyre
TIRANË- Gjykata e Apelit të Posaçëm ka vendosur të shtyjë seancën në ngarkim të kryebashkiakut të Tiranës, Erion Veliaj, i arrestuar me urdhër të SPAK.
Gazetari i ABC News, Ermal Vija raporton se prokurorët e çështjes kanë paraqitur prova të reja, ndërsa për këtë arsye është kërkuar kohë nga mbrojtja e kryebashkiakut.
Seanca e radhës do të mbahet të mërkurën në orën 12:30 minuta. Avokatët e kryebashkiakut kanë kërkuar shfuqizim të masës së arrestit në burg ose ndryshim me një masë më të lehtë, duke ofruar edhe garanci pasurore.
Avokati i mbërritur nga SHBA Joshua Robert ka bërë kërkesë për të marrë pjesë në seancë në cilësinë e vëzhguesit, por gjykata refuzoi prezencën e avokatit amerikan, të ishte në seancë në cilësinë e vëzhguesit.
Të pranishëm në seancë janë edhe dy prokurorët e posaçëm Altin Dumani dhe Ols Dado.
Prej datës 10 shkurt, kryetari i bashkisë së Tiranës mbahet i arrestuar me dyshimin se ka kryer dy vepra penale, atë të korrupsionit dhe pastrimit të parave. Në seancën e mbajtur 2 ditë më vonë pas arrestimit, më 12 shkurt për vleftësimin e masës së arrestit të dhënë në mungesë ndaj Veliajt, kryebashkiaku përmes avokatëve mbrojtës ofroi edhe garanci pasurore në këmbim të lirisë, por u refuzua nga gjykata.
Nga hetimet ka rezultuar se Erion Veliaj në cilësinë e kryetarit të bashkisë ka ngritur një skemë të mirëfilltë kriminale në bashkëpunim me bashkëshorten e tij Ajola Xoxën, biznesmenë dhe organizata jo fitimprurëse të lidhur me të për përfitimin e shumave të mëdha monetare. Nga ana tjetër, Veliaj ka pretenduar se akuzat e prokurorisë janë të pabazuara dhe tendencioze.
