Pacientja rikthehet në Spitalin Memorial për të shprehur mirënjohjen me një dhuratë simbolike
FIER – Në Ditën e Verës, një paciente e shëruar në Spitalin Rajonal Memorial është rikthyer në ambientet e spitalit për të shprehur falënderimin e saj ndaj stafit mjekësor. E shoqëruar nga bashkëshorti, ajo solli një lule si shenjë mirënjohjeje për kujdesin dhe profesionalizmin e treguar gjatë trajtimit të saj.
Drejtoresha e spitalit, Rudina Degjonil, e ka cilësuar këtë gjest si një simbol shprese dhe një mesazh frymëzues për të gjithë. “Nuk ka fillim më të bukur për Ditën e Verës sesa me një paciente të shëruar dhe me urimin e saj plot shpresë! Le të jetë kjo ditë një ogur i mirë për të gjithë, duke na kujtuar se e ardhmja sjell gjithmonë ditë më të mira, më të ndritshme dhe më të bukura,” – u shpreh ajo.
Spitali Memorial në Fier vazhdon të jetë një model i kujdesit shëndetësor në vend, duke ofruar trajtim cilësor dhe duke rikthyer shpresën tek pacientët që kalojnë pragun e tij./fieriweb.com
