DVP Vlorë/ Procedohen penalisht 8 shtetas për vepra të ndryshme penale
Policia e Vlorës ka referuar në Prokurori materialet hetimore dhe ka nisur procedimin penal për tetë shtetas të dyshuar për vepra të ndryshme penale në qytete të ndryshme të qarkut.
Në Vlorë, një 37-vjeçare nga Tirana dyshohet se ka keqtrajtuar foshnjën e saj 5 muajshe, e cila tashmë ndodhet në kujdesin e shërbimeve sociale. Gjithashtu, një 40-vjeçar nga Kanina akuzohet për vjedhjen e 180 litrave vaj ulliri dhe një arme gjahu në një banesë.
Në Orikum, autoritetet po hetojnë djegien e një eskavatori pranë “Portit të Jahteve”, ndërsa në Himarë, një 84-vjeçar dhe një 41-vjeçar janë proceduar pas një konflikti pronësie.
Në Sarandë, një 35-vjeçar nga Ksamil dyshohet për kanosjen e xhaxhait të tij për çështje pronësie, ndërsa një 44-vjeçar akuzohet për prishje të qetësisë publike dhe kundërshtim të policisë. Po ashtu, dy gra, 35 dhe 60 vjeçe, janë proceduar pas një konflikti fizik në rrugë.
Materialet i janë referuar Prokurorisë për veprime të mëtejshme.
