Fier – Identifikohet gruaja e plagosur nga të shtënat në fshatin Sulaj, policia ngre pika kontrolli
Një ngjarje e rëndë është regjistruar këtë të martë në fshatin Sulaj të Fierit, ku një grua ka mbetur e plagosur si pasojë e të shtënave me armë zjarri.
E plagosura është identifikuar si Suzana Merrnica, e cila ka marrë plagë në trup dhe është transportuar me urgjencë drejt spitalit rajonal të Fierit, ku po merr ndihmën mjekësore të nevojshme. Ende nuk ka informacion zyrtar mbi gjendjen e saj shëndetësore.
Policia e Fierit ka mbërritur menjëherë në vendngjarje dhe ka nisur hetimet për zbardhjen e plotë të rrethanave të ngjarjes. Gjithashtu, janë ngritur pika kontrolli në zonë për të ndaluar dhe identifikuar autorin apo autorët e mundshëm të kësaj ngjarjeje kriminale.
Hetimet vijojnë në drejtim të kapjes së autorit dhe sqarimit të motivit të sulmit.
