Vlorë – 25-vjeçari nga Fieri tenton të korruptojë policinë pasi kapet duke drejtuar mjetin në gjendje të dehur
Drejtoria Vendore e Policisë Vlorë njofton se gjatë 24 orëve të fundit janë arrestuar në flagrancë 3 drejtues automjetesh, pasi u kapën duke drejtuar mjetin në gjendje të dehur. Njëri prej tyre, shtetasi N. Sh., 25 vjeç, banues në Fier, jo vetëm që rezultoi nën efektin e alkoolit, por edhe tentoi të korruptonte efektivët e Policisë Rrugore duke u ofruar një shumë prej 4000 lekësh, me qëllim shmangien e ndëshkimit.
Gjithashtu, janë arrestuar edhe shtetasit A. B., 44 vjeç, dhe S. Sh., 34 vjeç, të dy banues në Vlorë, për të njëjtën shkelje.
Sipas Policisë Rrugore të Vlorës, gjatë 10 ditëve të para të muajit prill janë intensifikuar kontrollet në akset urbane dhe interurbane në Vlorë dhe Sarandë, duke çuar në:
- arrestimin e 9 drejtuesve mjetesh,
- pezullimin e 6 lejeve të drejtimit,
- vendosjen e 2525 masave administrative.
Shkeljet më të shpeshta përfshijnë:
- 314 gjoba për parakalime të gabuara,
- 171 gjoba për mosvendosje të rripit të sigurimit,
- 124 masa për përdorim celulari gjatë drejtimit,
- 51 gjoba për drejtim nën efektin e alkoolit,
- 51 gjoba për tejkalim të shpejtësisë.
Policia Rrugore i bën thirrje të gjithë drejtuesve të automjeteve të respektojnë rregullat e qarkullimit rrugor, duke shmangur shpejtësinë, alkoolin dhe çdo shkelje që rrezikon jetën e tyre dhe të të tjerëve.
Respekto rregullat, mbro veten dhe të tjerët!
